ཁ་སང་གི་གནའ་གཏམ།
དེ་རིང་ཕྱི་དྲོ་དུས་ཚོད་གཉིས་དང་ཕྱེད་ཀའི་སྟེང་རང་སློབ་གྲྭས་གཙོ་སྒྲུབ་དང་སློབ་སྟོན་ཁང་གིས་འགན་སྒྲུབ་བྱས་པའི་སྐབས་གསུམ་པའི་《མེས་པོའི་རྣམ་དཔྱོད་རྣ་བའི་བུ་རུམ》ཞེས་པའི་གནའ་གཏམ་འགྲན་སྡུར་དངོས་སུ་འགོ་བརྩམ།
འགྲན་སྡུར་སྟེང་སློབ་གཙོ་ཚེ་གཟུངས་འཚོ་གཙོ་མཛད་པའི་དཔྱད་འདེམས་དགེ་རྒན་དག་དང་དམའ་རིམ་སྡེ་ཁག་གི་དགེ་སློབ་ཡོངས་ཚབ་ཞུགས་གནང་། བྱིས་པ་ཚོའི་འཇོན་ཐང་ལྡན་པའི་ཁ་ལྕེ་དང་ཉམས་འགྱུར་ལེགས་པའི་བཟོ་ལྟ། གསལ་ཞིང་དག་པའི་སྐད་གདངས་བཅས་ཀྱིས་ཉན་མཁན་ཡོངས་ལ་སྔར་མེད་པའི་མེས་པོ་དག་གི་བྱས་རྗེས་ལ་དུངས་བའི་བློ་མིག་སྐྱེད།
ལྷད་མེད་སློབ་བུ་ཡོངས་ཀྱིས་དྲིན་ལྡན་ཕ་མར་བཀུར་བསྟི་དང་དགེ་རྒན་དམ་པའི་ཞལ་གསུངས་བརྩིས་ནས། རང་མི་རིགས་ཀྱི་སྲོལ་བཟང་འཛིན་སྐྱོང་སྤེལ་གསུམ་བྱེད་པའི་གལ་ཆེའི་རང་བཞིན་གྱི་གནའ་གཏམ་མང་པོ་བཤད།
སློབ་རིམ་རེ་ནས་ཨང་དང་པོ་ནས་གསུམ་པའི་བར་དང་ཕུལ་བྱུང་བཅས་ཀྱི་བྱ་དགའི་བདག་རྐྱེན་བསྩལ་ཡོད།
ལྔ་རིག་ཆུ་འཛིན་འཛིན་པའི་བ་གམ་ལས།།
སྨྲ་ལྕེ་གཡུ་འབྲུག་རྒོད་པོས་དངོས་གྲུབ་སྦྱིན།།
ཡབ་མེས་ཞལ་གསུངས་རྣལ་མའི་མཆོད་པ་འདི།།
རབ་དཀར་ཞིང་མཆོག་འདི་ཡི་དཔལ་དུ་ཕུལ།།