སྤྱི་ལོ་༢༠༢༤ལོའི་ཟླ་༦པའི་ཚེས་༦ཉིན་དར་ལག་རྫོང་བོད་སྨན་རྩིས་ཁང་གི་གླིང་གཙོ་ཆོས་མགོན་གཙོ་བྱས་སྨན་པ་དང་སྨན་ཞབས་པ་མི་ལྔ་ཞོགས་པའི་ཆུ་ཚོད་དྲུག་པ་ནས་ལམ་ལ་ཆས་ཏེ་དཔོན་སྐོར་སྟོད་མའི་ཉི་སྟོད་ཀྱི་སངས་རྒྱས་སྨན་བླ་དང་ཞང་བློན་སྡེ་དགུའི་གདན་སའི་རང་བྱུང་ཆུ་ཚན་ངོས་འཛིན་དང་ཡུལ་དེ་གའི་སྨན་ངོ་ངོས་འཛིན་ལ་ཕྱིན།
སྟོད་ན་གངས་དཀར་རི་བོ་ཚར་དུ་དངར་ཞིང་བར་ན་ཚང་ཚིང་གཡུ་ལོ་ཐག་སུ་བཀྲ་བ། སྨད་ན་རང་བྱུང་ཆུ་ཚན་ལྷོད་ཀྱིས་འབབ་སའི་དཔོན་སྐོར་སྟོད་མའི་ཉི་སྟོད་ཀྱི་སངས་རྒྱས་སྨན་བླ་དང་ཞང་བློན་སྡེ་དགུའི་གདན་ས་ནས་སངས་རྒྱས་སྨན་བླའི་ཆུ་ཚན་དང་གེ་སེར་ཆུ་ཚན། འབྲུག་མོའི་ཆུ་ཚན་སོགས་ཆུ་ཚན་ཉི་ཤུ་ལྷག་ངོས་འཛིན་མཛད་པ་དང་། དེ་མིན་གནས་རི་ཁྱད་པར་བ་དེ་རུ་འཁྲུངས་བའི་རྩྭ་ད་བྱིད་དུ་འབོད་པའི་དབྱར་རྩྭ་དགུན་འབུ་དང་ཨུཏྤལ་སེར་བོ། བྱ་རྒོད་སྤོས། བྱ་རྒོད་སུག་པ། ཨ་བྱག་ཚེར་སྔོན་སོགས་སྨན་སྣ་སུམ་ཅུ་ལྷག་ངོས་འཛིན་མཛད།
དེ་ཡང་རང་བྱུང་ཆུ་ཚན་དེ་དག་གི་གྲུབ་ཆ་གཙོ་བོ་ནི་མུ་ཟི་དང་རྡོ་སོལ། ཅོང་ཞི་སོགས་རང་བྱུང་སྨན་རྫས་ཀྱིས་གྲུབ་པ་ཞིག་ཡིན་པས། ཡུལ་དེ་གའི་མང་ཚོགས་རྣམས་གནའ་སྔ་མོའི་དུས་ནས་བཟུང་། གྲུམ་བུ་དང་མཁལ་འགྲམས། ཡན་ལག་རེངས་འཁུམས་ཆགས་པ། རྨ་རྒན། ཡན་ལག་སྐྲངས་པ། མཇིང་ཚིགས་ན་བ་སོགས་བྱུང་ན་རང་བྱུང་ཆུ་ཚན་དེ་དག་ལ་འདུག་པའི་སྲོལ་ཡོད་ལ། ཕན་སྐྱེད་ཀྱང་མིག་མཐོང་ལག་ཟིན་དུ་མངོན་པས་ཡུལ་མི་ཀུན་གྱིིས་བསྔགས་པའི་ཡུལ་དང་བསྟོད་པའི་གནས་ཤིག་ཏུ་ཆགས་ཡོད།
གཞན་ཡང་ཆུ་ཚན་འདིའི་ཁྱད་ཆོས་ནི་ཕྱིའི་དུས་ཚིགས་ཀྱི་འགྱུར་ལྡོག་དང་བསྟུན་ནས་ཆུ་ཚན་གྱི་དྲོད་ཚད་ཡང་མི་འདྲ་བར་དགུན་དུས་ཇེ་མཐོར་འགྲོ་བ་དང་དབྱར་དུས་ཇེ་དམའ་རུ་འགྲོ་བས་ཕྱི་ནང་གི་མེ་དྲོད་དང་འབྱུང་བཞིའི་འགྱུར་བ་དང་ཤིན་ཏུ་འཕྲོད།
དེ་བས་རང་སྨན་ཁང་གི་སྲོལ་རྒྱུན་རིག་གནས་མི་ཉམས་གོང་འཕེལ་དང་ཉམས་པ་སླར་གསོ་བྱས་ཏེ། མ་འོངས་པ་ན་སྲོལ་རྒྱུན་དང་བསྟུན་ཏེ་སྲིད་ཁྲིམས་དང་མཐུན་པའི་སྒོ་ནས་རང་བྱུང་ཆུ་ཚན་རྨང་གཞིར་བགྱིས་ཏེ་རང་སྨན་ཁང་གི་སྨན་ལུམས་ཚན་ཁག་རྒྱུད་འཛིན་དང་དར་འཕེལ་གཏོང་རྒྱུའི་ཐད་ལ་སྟོབས་ཤུགས་ཡོད་དགུ་འདོན་རྒྱུའི་བློ་ཐག་བཅད།