ཨ་མ་ནི་རང་གཞན་ཀུན་གྱི་དཀོན་མཆོག་ཡིན།
—— རྫ་དུང་ཟླ
ཨ་མ་ཁྱེད་ནི་ཁྲི་གདུགས་གསེར་ཉི་འདྲ།།
དྲོད་འཇམ་ཉི་མའི་འོད་ཟེར་བདག་ལ་འཕྲོ།།
ཚེ་སྲོག་ལུས་ཀྱི་ས་བོན་ཁྱེད་ཀྱི་བཏབ།།
དྲིན་ཆེན་མ་རྣམས་སྐུ་ཚེ་བརྟན་པར་སྨོན།།
ཨ་མ་ཁྱེད་ནི་སྦྲང་ཆར་སིལ་མ་འདྲ།།
དྭངས་གཙང་ཆབ་རྒྱུད་ནུས་ཤུགས་ལུས་ལ་འཕྲད།།
ལང་ཚོ་སྨྱུ་གུའི་ལོ་འདབ་ཁྱེད་ཀྱི་སྦྱིན།།
དྲིན་ཆེན་མ་རྣམས་སྐུ་ཚེ་བརྟན་པར་སྨོན།།
ཨ་མ་ཁྱེད་ནི་བཅུ་ཕྲག་རིག་གཞུང་འདྲ།།
བསླབ་བྱ་སྙིང་པོ་བདུད་རྩི་སེམས་ལ་འཐིམ།།
ཤེས་རབ་མ་འོངས་ལམ་སྟོན་ཁྱེད་ཀྱི་མཛད།།
དྲིན་ཆེན་མ་རྣམས་སྐུ་ཚེ་བརྟན་པར་སྨོན།།
ཨ་མ་ཁྱེད་ནི་ནོར་འཛིན་ས་གཞི་འདྲ།།
བྱམས་དང་བརྩེ་བའི་དཔང་ལས་བདེ་སྐྱིད་ཐོབ།།
ཁྱིམ་གཞིས་ལོངས་སྤྱོད་རྒྱུ་ནོར་ཁྱེད་ཀྱི་བསྩལ།།
དྲིན་ཆེན་མ་རྣམས་སྐུ་ཚེ་བརྟན་པར་སྨོན།།
ཨ་མ་ཞེས་པའི་མགོན་དང་སྐྱབས་ཀྱི་གནས།།
སྐྱེ་འགྲོ་སྲོག་ལྡན་རང་རང་བཀོད་པའི་མ།།
དོན་དང་དངོས་པོ་གནས་ལུགས་བརྗོད་པ་ན།།
དངོས་གྲུབ་ཡོད་ཚད་གནང་མཁན་དཀོན་མཆོག་འདིའོ།།