ཁྱིམ་བདག་ལ་སྤྲིངས་པའི་འཕྲིན་ཡིག།

གུས་པར་འོས་པའི་ཁྱིམ་བདག་ལགས།

     སྐུ་བདེའམ།

    ད་ནི༢༠༢༣-༢༠༢༤ལོའི་སློབ་སྐབས་སྟོད་ཀྱི་བྱ་བ་ཡོངས་སུ་མཇུག་རྫོགས་པ་ལ།ཁྱེད་ཀྱི་དཔྲལ་བའི་མིག་དང་སྙིང་གི་དུམ་བུར་གྱུར་བའི་བྱིས་པ་མ་འོངས་པར་འཇོན་ཐང་ཅན་ཞིག་ཏུ་སྐྱེད་སྲིང་བྱ་རྒྱུ་ནི་ཁྱེད་ཀྱི་རེ་འདོད་ཉག་གཅིག་ཡིན་ངེས་ལ། སྤྱི་ཚོགས་ཀྱི་དགོས་མཁོ་བསྐོང་ཐུབ་པའི་མི་སྣ་ཞིག་ཏུ་སྐྱེད་སྲིང་བྱ་རྒྱུ་ནི་ཏང་གིས་མི་དམངས་དགེ་རྒན་ལ་སྤྲད་པའི་བླ་མེད་ཀྱི་ལས་འགན་ཞིག་ཀྱང་ཡིན་སྟབས།ཁྱེད་ཀྱིས་ནམ་རྒྱུན་ངེད་སློབ་གྲྭའི་བྱ་བར་ཐོག་མཐའ་བར་གསུམ་དུ་རྒྱབ་སྐྱོར་དང་ཐུགས་ཁུར་གནང་བར་སྙིང་ཐག་པ་ནས་བཀའ་དྲིན་ཆེ་ཞུས་པ་ཡིན། རྨ་ལྷོ་ཁུལ་སློབ་གསོ་ཅུས་ཀྱི་བཀོད་སྒྲིག་གཞིར་བཟུང་ནས། ངེད་སློབ་གྲྭས་ཟླ༡པའི་ཚེས༢༧ཉིན་ནས་བཟུང་གནང་བ་སྟེར་རྒྱུ་ཡིན་པ་དང་། ཟླ༢པའི་ཚེས༢༩ཉིན་ཕྱིར་འཚོག་རྒྱུ་ཡིན་ལ། ཉིན་དེ་ནས་བཟུང་རྒྱུན་ལྡན་ལྟར་དགོང་ཚོགས་འཚོག་རྒྱུ་ཡིན། བྱིས་པ་དག་གིས་བདེ་འཇགས་དང་སྤྲོ་སྐྱིད་ལྡན་པའི་དགུན་གནང་གི་འཚོ་བ་ཞིག་རོལ་ཐུབ་ཆེད། འུ་ཅག་གིས་མཉམ་དུ་བྱིས་པའི་བདེ་འཇགས་སློབ་གསོ་དང་དོ་དམ་ལ་ཤུགས་རྒྱག་དགོས་ཤིང་། འདིར་བདེ་འཇགས་སློབ་གསོ་དང་བྱིས་པའི་དོ་དམ་ཐད་ནས་གསལ་འདེབས་འགའ་ཞུ་རྒྱུ་ཡིན་པས། ཁྱེད་ཀྱི་རྒྱབ་སྐྱོར་འཐོབ་པའི་རེ་བ་ཤིན་ཏུ་ཆེ།

     རྒྱུན་དུ་བྱིས་པར་འགྲིམ་འགྲུལ་སྒྲིག་སྲོལ་བརྩི་སྲུང་བྱ་དགོས་པའི་སློབ་གསོ་གཏོང་དགོས་ཤིང་། ཡུལ་དུ་ལོག་པའམ་སློབ་གྲྭར་འགྲོ་སྐབས། གང་ནུས་ཀྱིས་སྤྱི་སྤྱོད་རླངས་འཁོར་དུ་འདུག་དགོས་པ་ལས། སྤྱོད་ཡུན་བརྒལ་བའི་རླངས་འཁོར་དང་། ཞིང་སྤྱོད་རླངས་འཁོར། འཛིན་ཡིག་མེད་པའི་རླངས་འཁོར། ཁྲིམས་དང་མི་མཐུན་པའི་རླངས་འཁོར་སོགས་ལ་འདུག་མི་རུང་ཞིང་། དེ་དང་ཆབས་ཅིག་ཁྱིམ་བདག་གིས་རང་གི་སྒེར་འཁོར་དང་འཕྲུལ་རྟ་སོགས་ལ་དོ་དམ་བཟང་བོ་བྱས་ཏེ། བྱིས་པས་དེ་དག་གི་བསྐོར་ནས་དོན་རྐྱེན་བཟོ་བར་སྔོན་འགོག་བྱ་དགོས།

    བྱིས་པར་མགོ་གཡོག་མགོ་སྐོར་མི་ཐེབས་པའི་ནུས་པ་དང་མགོ་གཡོག་མགོ་སྐོར་སྔོན་འགོག་གི་འདུ་ཤེས་ཇེ་དྲག་ཏུ་གཏོང་བའི་སློབ་གསོ་གཏོང་དགོས། དེ་ཡང་སུ་ཡིན་ལ་ཡིད་ཆེས་མི་བྱ་བ་དང་། གང་ཡིན་ལ་ཧམ་སེམས་མི་སྐྱེ་བ། གང་འདོད་དུ་དངུལ་སྒོར་མ་བསྐུར་ན་གཞན་གྱི་གཡོ་འོག་ཏུ་ཚུད་དཀའ་བས། དངུལ་ཁང་བྱང་བུ་དང་། ཁ་པར་བྱང་བུ་སོགས་གཞན་ལ་འཚོང་བ་དང་གཡོར་བའི་ལས་བསྒྲུབ་མི་རུང་བར་མ་ཟད། མི་ཆ་མེད་ལ་རང་སྒེར་གྱི་ཆ་འཕྲིན（ཐོབ་ཐང་ལག་ཁྱེར་ཨང་གྲངས་དང་། ཁ་པར་ཨང་གྲངས། སྐད་འཕྲིན་དང་། QQ མགྱོགས་འཕྲིན་སོགས་ཀྱི་ཨང་གྲངས་དང་གསང་གྲངས་ལ་སོགས་པ）ཕྱིར་བསྒྲགས་བྱ་མི་རུང་། ཁྱེད་ཀྱིས་རང་དང་བྱིས་པའི་བར་ལ“ཁྱིམ་ཚང་གི་གློག་རྡུལ་ཐོན་རྫས་བེད་སྤྱོད་སྤྱི་ཆིངས”བཞག་ནས། དྲ་ཞུགས་དུས་ཡུན་དང་ནང་དོན་ཚོད་འཛིན་བྱ་བ་དང་། སློབ་སྦྱོང་ངམ་འཚོ་བ་དང་འབྲེལ་བ་མེད་པའི་སྐད་འཕྲིན་ཚོགས་པ་དངQQཚོགས་པ་རང་གིས་མི་འཛུགས་ཤིང་གཞན་གྱིས་བཙུགས་ཟིན་པའི་ཁྲོད་དུ་ཞུགས་མི་རུང་བའི་གྲོས་གཞི་བཏོན་པ་ཡིན། ད་དུང་། རྒྱུས་མེད་ཀྱི་དྲ་ཚིགས་སུ་མི་འཛུལ་བ་དང་སློབ་སྦྱོང་དང་འབྲེལ་བ་མེད་པའི་རྒྱུ་ཆ་དང་དཔེ་ཆ་སོགས་ཕབ་ལེན་མི་བྱ་བ། དངོས་སུ་འགྲེམ་སྤེལ་བྱས་མེད་པའི་དཔེ་ཆ་མཚམས་སྦྱོར་དང་ཕྱིར་འཚོང་མི་བྱ་བའང་གལ་ཆེ་བ་ཡིན།

     བྱིས་པ་ལ་གལ་སྲིད་བརྙས་བཅོས་བྱེད་མཁན་བྱུང་ན་ངེས་པར་དེ་མ་ཐག་ནས་དགེ་རྒན་དང་ཁྱིམ་བདག་ལ་བཤད་དགོས་པའི་སློབ་གསོ་གཏོང་དགོས་པ་དང་། ཁྱིམ་བདག་གིས་ཀྱང་བྱིས་པ་ལ་རྒྱུན་ལྡན་མིན་པའི་གནས་ཚུལ་ཡོད་མེད་ལ་མཉམ་འཇོག་བྱ་དགོས། གལ་ཏེ་སློབ་མ་བརྙས་བཅོས་དང་འཕྲད་པའི་གནས་ཚུལ་ཤེས་རྟོགས་བྱུང་ན་བྱིས་པར་སྡིགས་མོ་མི་བྱ་བར་མྱུར་དུ་སློབ་གྲྭ་དང་འབྲེལ་གཏུག་བྱ་དགོས་ལ། བྱིས་པར་བློ་རིག་བཀྲ་བའི་སྒོ་ནས་བརྙས་བཅོས་དང་དྲག་ཤུགས་ཀྱི་ཁ་གཏད་དུ་ལངས་རྒྱུའི་སྐུལ་ལྕག་བྱ་དགོས། གནོད་འཚེ་ངན་པ་དང་འཕྲད་ན་ངེས་པར་དེ་མ་ཐག་ཏུ་ཁྱིམ་བདག་ལ་བཤད་དེ་དུས་ཐོག་ཏུ་ཉེན་ཞུ་དང་བདེན་དཔང་གཏན་འཇགས་བཟོས་ཏེ། དོགས་ཡོད་ཉེས་ཅན་འཛིན་ཐུབ་པར་འབད་དགོས་པའི་སློབ་གསོ་གཏོང་དགོས་ཤིང་། བཅའ་ཁྲིམས་ཀྱི་ལག་ཆ་ལ་བརྟེན་ནས་རང་གི་ཁྲིམས་མཐུན་ཁེ་དབང་ལ་སྲུང་སྐྱོང་བྱ་ཤེས་པར་སྐུལ་དགོས།

   བྱིས་པས་རང་ཉིད་ཀྱི་སེམས་ཁམས་རང་ཉིད་ཀྱིས་སྙོམ་སྒྲིག་བྱ་བར་ཁྲིད་སྟོན་བྱ་བ་དང་། བྱིས་པའི་སློབ་སྦྱོང་ལ་དོ་ཁུར་བྱས་ནས་བསྔགས་བརྗོད་མང་དུ་བྱ་བ་དང་སྐྱོན་བརྗོད་ཉུང་དུ་བྱ་བ། རྒྱུ་མཚན་མང་དུ་འཚོལ་བ་དང་གནོན་ཤུགས་ཉུང་དུ་སྤྲོད་དགོས། གང་ནུས་ཀྱིས་བྱིས་པའི་སློབ་སྦྱོང་གི་དཀའ་ངལ་སེལ་རོགས་བྱ་བ་དང་སློབ་སྦྱོང་གི་སེམས་ཤུགས་བྱིན་ཏེ། བྱིས་པ་དག་གིས་ཧུར་བརྩོན་ཡར་ཐོན་དང་སྤྲོ་སྣང་དཀྱེལ་ཆེའི་སེམས་ཁམས་ཤིག་རྒྱུན་འཁྱོངས་བྱ་བར་སྐུལ་དགོས། རྒྱུན་དུ་བྱིས་པ་དང་འབྲེལ་འདྲིས་མང་དུ་བྱས་ནས་རང་དང་བྱིས་པའི་བསམ་པའི་བར་ཐག་ཇེ་ཉེར་བཏང་སྟེ་ཕ་མ་དང་བུ་ཕྲུག་གི་འབྲེལ་བ་ལེགས་པོ་བཙུགས་ཏེ། སྤྲོ་སྐྱིད་འཆམ་མཐུན་གྱི་ཁྱིམ་ཚང་གི་ཁོར་ཡུག་འཛུགས་དགོས།

       བྱིས་པ་ལ་འབྲེལ་ཡོད་བཅའ་ཁྲིམས་གཏན་འབེབས་ཀྱི་ནང་དོན་ཤེས་སུ་བཅུག་སྟེ། ཆང་ཁང་དང་། KTV དྲ་ཁང་སོགས་ན་ཆུང་གཞོན་ནུའི་ལུས་སེམས་བདེ་ཐང་གོང་འཕེལ་ལ་མི་ཕན་པའི་གནས་སུ་འགྲོ་བར་གཏན་འགོག་བྱ་དགོས་ལ། “གཡེམ། དུག རྒྱན། ངན”སོགས་སྤྱི་ཚོགས་ཀྱི་སྐྱུག་བྲོ་བའི་སྣང་ཚུལ་དང་རྒྱང་བཀྱེད་དགོས། དུ་བ་མི་འཐེན་པ་དང་། ཆང་མི་འཐུང་བ། རྒྱན་མི་སྐུགས་པ། དུག་རྫས་དང་རྒྱང་བཀྱེད་དེ་རང་གི་ཚེ་སྲོག་ལ་གཅེས་སྤྲས་བྱ་དགོས། སློབ་འབྲིང་སློབ་མ་དང་མི་མཐུན་པའི་གཏམ་མི་སྨྲ་བ་དང་ལས་མི་སྒྲུབ་པ། སྤྱི་ཚོགས་ཀྱི་ཚོགས་པ་དང་མཐུན་ཚོགས་སྣ་ཚོགས་སུ་མི་ཞུགས་པ། དངོས་པོ་རྣོ་ངར་ཅན་དང་གྲི་ཡི་རིགས་སོགས་སློབ་རའི་ནང་དུ་ཁྱེར་ཡོང་མི་རུང་།

    ཁྱིམ་བདག་གིས་ངེད་སློབ་གྲྭའི་སྐད་འཕྲིན་སྤྱི་སྟེགས་ལ་དོ་ཁུར་བྱས་ནས། དེ་རུ་བཀོད་པའི་སློབ་གསོ་པུའུ་ནས་སྤེལ་བའི་སློབ་གྲྭ་ཆུང་འབྲིང་གི“དོན་ཚན་ལྔའི་དོ་དམ”（ལས་བྱ་དང་། གཉིད། ཁ་པར། ཀློག་དེབ། ལུས་ཁམས་བཅས་ཀྱི་དོ་དམ）ལ་ཤུགས་སྣོན་པའི་སྐོར་གྱི་འབྲེལ་ཡོད་རེ་འདུན་ལ་རྒྱུས་ལོན་བྱ་དགོས་ཤིང་། སློབ་མའི་ལས་བྱའི་འགན་ཁུར་ཇེ་ཡང་དུ་གཏོང་བ་དང་། བསླབ་ཕྱིའི་གསོ་སྦྱོང་གི་འགན་ཁུར་ཇེ་ཡང་དུ་གཏོང་དགོས། སྒྲིག་འགལ་གྱི་གསོ་སྦྱོང་དུ་མི་ཞུགས་པ་དང་། རྩ་འཛུགས་མི་བྱ་བ། རྒྱབ་སྐྱོར་མི་བྱ་བར་སློབ་མ་བདེ་ཐང་ངང་འཚར་ལོངས་འབྱུང་བར་ཕན་པའི་ཁོར་ཡུག་ཅིག་བསྐྲུན་ནས། སློབ་མའི་བདེ་ཐང་འཚར་ལོངས་ལ་སྐུལ་འདེད་བྱེད་དགོས། སློབ་མགོ་རྩོམ་དུས་ཁྱིམ་བདག་གིས་བྱིས་པར་ལག་ཁྱེར་ཁ་པར་སློབ་གྲྭའི་ནང་དུ་ཁྱེར་ནས་ཡོང་དུ་འཇུག་མི་རུང་། 

    བྱིས་པར་ལུགས་མཐུན་གྱི་སློབ་སྦྱོང་གི་འཆར་གཞི་ཞིག་བཟོ་རུ་འཇུག་པ་དང་། རང་ཚུགས་དང་ནན་ཏན་གྱི་སྒོ་ནས་དབྱར་གནང་ལས་བྱ་འགྲུབ་པར་བྱ་དགོས། སློབ་གྲྭས་ལས་བྱའི་མང་ཉུང་ལ་ཚོད་འཛིན་ནན་མོ་བྱས་ཡོད་ལ། ལས་བྱའི་རྣམ་པ་གསར་གཏོད་བྱེད་པ་ལས་བསྐྱར་ཟློས་རང་བཞིན་གྱི་ལས་བྱ་གཏན་འགོག་བྱས་ཡོད། བྱིས་པ་ཧུར་བརྩོན་གྱིས་སྤྱི་ཚོགས་ལག་ལེན་དང་ལུས་རྩལ་སྦྱོང་བརྡར་ནང་ཞུགས་སུ་འཇུག་དགོས་ཤིང་། དཔེ་ཀློག་མང་དུ་བྱས་ནས་རང་གི་ཤེས་རྒྱ་ཆེ་རུ་གཏོང་དུ་འཇུག་དགོས། ཁྱེད་ཀྱིས“མཚོ་སྔོན་ཞིང་ཆེན་སློབ་འབྲིང་སློབ་མའི་ཕྱོགས་བསྡུས་བྱང་ཚད་གདེང་འཇོག་མ་ལག” བརྒྱུད་དེ་བྱིས་པའི་སྦྱང་འབྲས་དང་སློབ་སྦྱོང་གི་གནས་ཚུལ་ལ་རྒྱུས་ལོན་བྱས་ཆོག

   རྨ་ལྷོ་ཁུལ་གྱི་མཐོ་འབྲིང་རིམ་པའི་རོགས་སྐྱོར་སྲིད་ཇུས་ཀྱི་ནང་དོན་དང་རོགས་སྐྱོར་ཐོབ་པའི་སློབ་མའི་གནས་ཚུལ་ལ་རྒྱུས་ལོན་བྱ་དགོས་ཤིང་། དགོས་མཁོ་བྱུང་དུས་འཛིན་བདག་དང་སློབ་གྲྭའི་རོགས་སྐྱོར་གཞུང་སྒྲུབ་ཁང་གི་མི་སྣ་དང་འབྲེལ་བ་བྱས་ནས་གནས་ཚུལ་རྒྱུས་ལོན་བྱས་ཆོག

      སློབ་མགོ་རྩོམ་དུས་སློབ་གྲྭས་སློབ་མའི་གྱོན་ཆས་བབ་ཆགས་གཙང་དག་ཡིན་དགོས་ཤིང་། སྐྲ་ཡི་ཁ་དོག་མི་བསྒྱུར་བ་དང་། སྐྲ་ཉམས་མཚར་བོ་མི་འཇོག་པ། རྒྱན་ཆ་མི་འདོགས་པར་བབ་ཆགས་ཀྱི་འཚོ་བའི་གོམས་གཤིས་གསོ་སྐྱོང་བྱ་དགོས་པའི་རེ་འདུན་བཏོན་ཡོད། ཁྱིམ་བདག་གིས་སློབ་གྲྭའི་བྱ་བར་རྒྱབ་སྐྱོར་བྱས་ཏེ། བྱིས་པ་དུས་ལྟར་སློབ་གྲྭར་སྐྱེལ་རྒྱུའི་རེ་བ་ཧ་ཅང་ཆེ།

                            རྨ་ལྷོ་ཁུལ་མི་རིགས་སློབ་འབྲིང། 

                         ༢༠༢༤ལོའི་ཟླ༡པའི་ཚེས ༢༦ཉིན།